松澗西日料理 (已結業)

临近岁晚，同同事喺街谂紧lunch食乜好，咁啱有个姐姐派单，原来丰利中心新开咗间餐厅，咁就一致决定上去试试佢。同事叫咗个汁烧牛柳糖心蛋便当，盛惠$78，小弟就冇份食，但同事就话啲牛烧得够入味又淋，好好食㖞，等小弟下次就试下。我自己就叫咗个蒜油海蚬意大利面，再加2件忌廉蟹肉薯饼，个意粉好好食呀，好香蒜油味，意粉软硬度又啱啱好，$48都好抵下。加$12加咗2件忌廉蟹肉薯饼，又几好食㖞，啱啱炸起，卜卜脆，入面又够味，正！好彩咁啱收到姐姐派传单先知开咗间好嘢，以后观塘开饭又多个选择。