彤福軒

营业中

休息中

呢间酒店入面嘅中菜馆啲点心真系精心炮制，拣咗佢哋tasting menu，咁就唔使烦要拣啲乜嘢食啦。松茸辽参烧卖做得精致，而且味道都唔错。富贵濑尿虾饺大大只濑尿虾，口感非常好。油鸡枞菌上素饺系三款点心之中最出色，小小辣带出非常新鲜清爽嘅味道，唯一美中不足系食唔出油鸡枞菌嘅味道。彤福生拆鲜鱼羹真系做得唔错，有鱼嘅鲜味但系就冇泥味，而且又唔醒，非常难得。陈皮芋蓉香鸭酥亦做得精彩，加入陈皮之后除咗佢独特嘅香味之外，另外食落去嘅时候亦令到个香鸭酥唔会咁油腻。瑶柱虾干煮茭白鲜味得黎又带住一股清新嘅香味，可能系啲葱、芽菜等嘅配料发挥佢哋嘅作用，个汤都熬得好精彩，完全冇味精，食落口就有一种好天然嘅感觉。五彩炒鱼面看似普通，但系又系一道色香味俱全嘅菜式，鱼面嘅质地好好，咬落去就会觉得鱼肉同埋面粉嘅比例做得唔错。甜品系香芋冻布甸，个芋头应该都几靓，因为芋头味好香，同个布甸质感配合得好好。