蓮香居 (已結業)

星期日晏昼去莲香居饮茶,上咗3楼要自己揾位,小学之后都未试过要自己揾位,我哋三个人喺咁多枱前面有啲迷惘,大家决定分散投资考下自己眼光估下边张枱就嚟走.成件事都充满挑战性,我企埋咗成枱女人嘅枱（估错晒,最后我哋食完嘢𠮶枱女人仲倾紧计. ）揾位真系好难,最后叔叔执紧枱𠮶阵叫咗我哋埋去坐低,先有得食咋.坐低叫咗个陈皮鸭腿汤饭先,过咗12点就会卖晒㗎啦.鸭腿个汤好好饮,饮晒啲汤都好饱啦. 跟住就等紧我最钟意𠮶个梅菜叉烧包,等极都冇, 问阿姐阿姐话2楼先有得卖你想食就自己落去买啦. 跟住就要抢莲蓉焗布甸,每个钟会出一次每次出十个到一出就冇㗎喇,所以我哋就要喺个厨房门口𠮶度等啦. 热辣辣嘅布甸一样咬落去好幸福. 仲有见到平时少食嘅点心,例如新鲜嘅皮蛋酥,芝麻糕,咸菜猪肚汤,酥皮蛋挞,猪润烧卖,南乳猪手,好多都想试.爱上咗呢一间莲香居,感受到传统茶楼𠮶种风味同人情.想饮茶咁要自己揾到位先啦,想食布甸ar咁你就谂办法抢到啦.成件事好香港好得意,同平时去开由门口开始到坐低都有人serve嘅一般茶楼好不一样.我开始期待下一个礼拜又去试下睇下抢到啲咩点心食啦.补番张焗布甸嘅相.