饗11 (已結業)

周末同先生喺铜锣湾行街，好一段时间冇食西餐，所以晚餐拣咗位于时代广场嘅呢间餐厅，主打西餐同铁板烧。Set dinner比较抵食，我哋拣咗一份4course dinner set同一个pizza，价钱合理。前菜系烟三文鱼配上芦笋，清新开胃，摆盘亦精致。今日嘅餐汤系南瓜汤，入口口感细滑，透住淡淡嘅南瓜香，质素唔错。主菜我哋拣咗美国prime肉眼扒，大大份，一上枱炭烤嘅香气扑鼻而来，要求medium well火候亦掌握得恰到好处，入口肉质松化冇筋，肉味突出而且肉汁丰富。配菜方面亦唔失色，薯仔以薯仔粒同薯饼嘅方式处理，呈现出唔同嘅风味同口感，焗蒜同黄椒亦非常可口。Parma ham pizza即叫即整，可以见到远处嘅师傅喺玻璃窗后制作嘅过程，Parma ham嘅鲜味配上香浓嘅芝士非常合衬，加上少量火箭菜减低腻滞感，饼底厚薄适中，表皮松脆内里带点香软，整体好有水准。