雞煲棧火鍋

营业中

休息中

食过几次鸡煲栈外卖，每次都系买番屋企食，未试过现场堂食，今日同朋友一齐试下堂食鸡煲，叫咗半只秘制重庆鸡煲 BB 辣。半只鸡都好大份，铺面劲大堆芫茜，入面有洋葱同姜葱，店员姐姐好好服务，过一阵就会过黎帮我地炒下个鸡煲，又频频换骨碟。鸡肉嫩滑有肉汁，好入味，鸡件 件件都大旧，滚得耐鸡肉都唔会干同硬晒，鸡煲酱汁好惹味，本身唔食得辣，BB 辣啱啱好，如果钟意食辣嘅朋友，可以叫小辣或者中辣。叫咗半份即叫即炸嘅响铃，超级好食，热辣辣，劲香脆，豆味浓，点啲鸡煲汁，好香口，黎鸡煲栈一定要食响铃。手打三宝丸有鲮鱼肉丸、虾丸、墨鱼丸，三款各有特色，粒粒都好结实弹牙，好足料鲜味。薯粉同午餐肉就一般火锅配料。我地坐楼上，当时比较人多，所以嘈吵啲，唔太适合一边滚一边倾计。两个人食咗$432，堂食全日免加一。如果黎食鸡煲栈，记得预先订枱先，因为成日都好 full。