無老鍋

营业中

休息中

无得去旅行几年，总会特别挂住系外国先食到既美食。无老锅真系每次去台湾既必食之选，系香港开分店固然正，想预约都唔容易，假日既晏昼嚟食，人流唔算多。店内仲有酱料自助区，无老特调酱油几开胃，可以一试。仲有蒜泥水、白醋、香油、辣椒、香葱等，白饭任装。冰淇淋豆腐锅汤底真系打边炉既精粹，充满鲜味又带点药膳果种回甘，加其他食材前先要饮番啖靓汤。吸收左汤汁既冰淇淋豆腐豆味好香。面包豆腐同鸭血仲可以任添。上选牛小排比想像中大碟好多，脂肪分布平均，牛味好浓郁，未至于入口即溶但都值得一试。综合丸分别有猪骨浓汁贡丸、牛骨浓汁牛丸、手工虾丸同埋手工花枝丸。味道好浓亦相当弹牙。综合饺分别有燕饺、蛋饺及鱼皮饺。饺子皮晶莹剔透，相当挂汁。鲜甜蔬菜盘一上碟，店员好好咁放左啲粟米落去个锅度煮。看似普通既蔬菜，整体食落都好鲜甜。水蜜桃沙冰食到滞滞地又饱饱地既时候，店员会送上细细杯既水蜜桃沙冰。呢一小杯清甜冰爽既沙冰真系不得了，消滞得嚟又开胃，饮完之后又可以继续大吃大喝！仲可以免费添加。埋单每人接近$500，但唔洗专登飞转台湾，又可以试到台湾既味道，有机会的话会再嚟帮衬！