火鍋郎 (已結業)

知道尖沙咀开左间新既火锅店，有和牛食，又有我最钟意既花胶汤底，当然即刻约埋老公嚟试试。叫左个招牌花胶响螺鸡金锅，侍应叫我地先试下个汤，点知一饮就上瘾了，非常清甜既鸡汤，最紧要系唔会太咸，又冇好重味精味，汤底仲好多花胶，饮完即刻又想饮！汤底配左一碟鸡，俾我地自己落，呢个安排好贴心，唔会令到个汤太多油。啲鸡肉肉质亦比一般既滑，简单咁沾少少酱汁已经好好食。重头戏当然系呢度既和牛。我叫左一碟A5熊本黑毛和牛西冷同一碟A5熊本黑毛和牛沙巴当，前者冇咁肥，比较有肉味；后者脂肪似雪花一样，入口即化，食一块系天堂既享受，食多一块我就有啲腻了，所以更喜欢西冷既肥瘦适中。另外亦要左一碟佐贺名水豚梅花肉，入口带少少爽劲，又唔错㖞！海鲜方面要左沙白大蚬同日本帆立贝，大力推介要试帆立贝，大大粒而且入口好鲜嫩！另外亦叫左手打孖宝丸，有海虾丸同墨丸，水准正常，比起其他食物就冇太特别。食左咁多肉类，最后当然要食返啲蔬菜，估唔到$48既蔬菜拼盘既量系咁多，而且啲菜仲好新鲜，抵！最后一提呢度仲有小食同埋唔同种类既酒精饮品，钟意饮返两杯既人就啱哂啦！不过非酒精饮品类既选择就比较少同普通。