壹玖陸零 (已結業)

最近发现好多餐厅都用年份嚟命名, 本身系一件好易记嘅事, 不过如果间间都系年份, 都真系几易记错🙃 今次去食嘅呢间🔸1960🔸系喺工厦入面嘅, 餐厅座位几阔落, 枱与枱嘅距离亦好足够, 唔会觉得挤迫。以红砖墙配霓虹光管, 可以比人用嚟打卡。🥘 椰菜花忌廉汤个汤望落去平平无奇, 不过饮落好惊喜, 香浓幼滑, 用菜嚟做嘅汤感觉好健康。🍝 传统卡邦尼意大利粉卖相好精致呀, 无谂过可以食到晚饭嘅水准。意粉软硬刚好, 卡邦尼汁浓稠适中, 可以挂汁。唯一美中不足系烟肉粒味道偏咸, 夹埋意粉一齐食会抢咗个味, 亦都无办法食晒。🍮 白兔糖奶冻脆脆我本身对甜品免疫, 本来打算试一啖, 结果佢系好味到令我食晒成杯(虽然唔系好大杯), 奶味香浓, 奶冻做得好幼滑, 配合埋脆脆一齐食, 口感好好。整体食物都好好, 职员亦都好Nice, 系一间高质嘅工厦餐厅, 值得推介。