Villa Villa Burger (已結業)

響鰂魚涌返工嘅朋友表示呢間burger嘅小店勁受歡迎，一到食晏時間就大排長龍。今晚難得經過，打算買外賣返屋企食，一於試下先。佢個menu主打四款burger，有傳統嘅牛肉，亦有好特色嘅西檸雞堡同手打蝦餅。加＄20可轉套餐，跟埋飲品同埋薯條。 Villa Villa Burger 雙層牛肉漢堡 ($118)店舖嘅signature - 用美國安格斯特選牛肉，雙層牛肉，煎得啱啱好，口感勁juicy肉味濃郁。加埋芝士、洋蔥、蕃茄等等，勁豐富，味道好有層次感。 手打蝦餅漢堡 ($78)份量勁多，蝦餅真係手打喎，入口非常彈牙，加埋泰式海鮮醬汁，酸酸甜甜，好惹味。呢個真係相當有特色，絕對係牛肉漢堡外嘅另一推介。 跟餐叫咗炸蕃薯條 (+$10)及炸薯條各一份，份量都好多，蕃薯同薯條都炸得好香好脆。如果嫌平時食得炸薯條多，番薯條都可以係一個幾好嘅選擇。田園沙律 （$40）-burger同薯條太邪惡嘅關係，叫咗個沙律平衡下。估唔到個沙律勁有誠意，竟然有少見石榴響裏面，味道提升咗。 外賣packing好企理，呢個食物質素，值得推介呀。