龍驤 (已結業)

今日终于又放假啦，专登同friend嚟到尖东呢间龙骧，午市套餐做紧8折，经OpenRice订座就有75折，真系好抵食。餐厅入面嘅装修好日式，一入去就见到好清雅嘅吧枱，坐喺度食饭真系充满风味。我要咗香葱吞拿鱼蓉丼。每份套餐都配沙律、茶碗蒸同埋面豉汤，另外都可以加钱要饮品，有汽水、乌龙茶、果汁同埋啤酒。啱啱落完单冇耐，就见到师傅准备紧我嘅吞拿鱼蓉丼。佢嘅卖相靓到忍唔住影多几张相，寿司饭上面铺咗大约三、四cm厚嘅吞拿鱼蓉，加埋葱、芝麻同埋海胆，侧边仲有紫菜碎。佢嘅吞拿鱼颜色鲜红，一睇就知好新鲜，比起普通寿司店粉红色嘅吞拿鱼蓉好好多。食落真系好鲜甜，一啲都唔腥，份量同埋配搭都好好，好好味。前菜沙律都好新鲜，配埋麻酱好开胃。面豉汤都好足料，唔系𠮶啲饮完会好口渴嘅咸面豉汤。个人认为佢个茶碗蒸真系好值得一试，食落真系好香滑。见佢Lunch time真系好多人嚟食，好快已经满座。如果想食嘅话，记得要book定位啦。