留白居酒屋 (已結業)

又到了景峰呢边揾食，见有间几型嘅日本野㖞，午餐七十至八十左右都ok吖，试下先。小店留白居酒屋，舖面系咪几型先？！小店真系小店，店内十个位左右，bar枱模式。叫左份午餐，有玄米茶，沙律，同面豉汤。沙律菜爽脆，多麻酱正呀。面豉汤热辣辣，有啲杂菇几香菌味。午餐点了呢个吉列猪扒丼，卖相几靓。Top shot睇落好细碗咁，其实唔系㗎，有一大块猪扒，饭都唔少。除左猪扒，仲有紫菜丝同青葱点缀，当然唔少得吉猪嘅酱汁啦，酸酸甜甜，有左个酱啲吉列猪扒好食好多。讲番块猪，外层炸得香脆，内里仲好有肉汁唔会干争争，有著少少猪油流出，十分甘香，再配埋个软绵绵嘅日本米饭，好满足呢。午餐无加一，都ok吖唔算贵，可能附近都系较相宜嘅食店，相比起黎留白午市好静，计埋自己都系得两枱客，唔唔～多多支持下小店啦。