八坂 (已結業)

琴晚同老公落街散吓步，行到去西营盘邮政局，发现BBQ隔离开咗间新餐厅。见到装修都几靓，又几干净企理，仲全院满座。于是八卦行去睇下有乜嘢食，原来系日式一人一锅打边炉，仲见到人哋食海鲜餐，啲海鲜望落好新鲜，仲有一个好精致放肉嘅层㗎，以为好贵。但原来佢食海鲜二人餐都系六百几蚊。于是订枱试吓，我同老公𠮶日叫咗个二人海鲜餐，店员都好落力推介。我哋一人叫咗一个汤底，一个系黑芝麻担担汤，一个系牛奶鱼汤，果然有惊喜，黑芝麻担坦汤店长话系佢哋自创嘅，食落好香黑芝麻味又有辣辣地嘅担担味。然后那鱼汤饮得出真系用鱼煲嘅而且同牛奶味好夹。海鲜真系好新鲜，只鲍鱼仲识郁嘅，有龙虾，龙趸鱼，虾，爆膏嘅蟹，仲有唔知系花甲定系大蚬。𠮶餐仲包埋一个层㗎，有食落都几靓嘅牛肉猪肉同鸡肉仲有芝心丸同豆腐丸，仲包埋一叠野菜同乌冬或者日式拉面。另外叫了个鹅肝多士,不得了！好味到想encore，不过好饱！仲有饭后甜品，我同老公拣咗紫薯奶冻同牛奶奶冻，都几好食。整体来讲，算系西环高质素嘅火锅。600几蚊来讲算系好抵食极都好值回票价！相信迟啲就会排长龙。