ENSŌ

营业中

休息中

自从西环大变天之后，我都好少再返旧屋，相隔几年再重返西环呢个地方觉得变化好大，就系旧屋附近多咗好多不同类型嘅餐厅，望住熟悉嘅海旁，我拣咗去到呢间日本餐厅，有少少百感滋味在心头，因为呢个海边就系满满的童年回忆。餐厅环境简约，最钟意佢有吧枱同埋有卡位，午餐时间有套餐，价钱合理，2个人唔系好肚饿食咗个鳗鱼饭再叫少少串烧，鳗鱼饭以定食形式上枱，鳗鱼烧得刚刚好，而且份量都几大，好香好味，馒鱼无骨厚肉，烧汁送饭成个定食轻易食晒。不得不赞除咗鳗鱼饭好食，连配菜都好出色，最欣赏系佢嘅海鲜面豉汤，唔系普通面豉汤只系得咸味，好有鲜甜嘅海鲜味好好饮。串烧惊喜地精彩，牛舌厚切，劲弹牙而唔un仲超有牛味，一级推介。鸡肾劲爽口好入味，鸡软骨一口一粒，如果夜晚送酒真系一流。最后赞下佢烧明太子，少少辣劲开胃，忍唔住最后叫咗个白饭送黎食，劲好味。呢间餐厅绝对高质，我直头觉得比起铜锣湾好多日本餐厅仲要好味，下次再回旧屋一定要夜晚来饮酒食串烧。