Homeland (東昌街) (已結業)

同朋友嚟开大埔，就去试下呢间好多人堆介嘅小店：Homeland。环境嚟讲几舒服，Chill，好啱同朋友食嘢倾偈。而且呢到有好多本地手工啤，仲可以Chill住饮嘢同时，支持本地嘅产业。呢排做紧推广，$108 2支手工啤。我地朋友一嚟就拣咗一人一支手工啤先：满月（Honeymoon：龙眼蜜味）同埋麦子嘅桂啤（桂圆味）。Honeymoon就好清香，酒味唔重，易入口，真系好似饮紧龙眼蜜咁；桂啤就重酒味D，偏苦（啤酒花），睇吓大家钟唔钟意啤酒𠮶种苦味。食物就叫咗一个三色藜麦八爪鱼沙律、一个Carbonara、一个明太子海鲜Pizza，同埋一个柠檬蛋白批。三色藜麦八爪鱼沙律($58)：加咗黑醋喺D沙律到；八爪鱼就有煎过，几香，不过有D难咬。整体嚟讲，系几特别嘅沙律。Carbonara ($128)：大推呢个！呢到唔系用烟肉，而系用火腿，肉嘅咸香味好正，同个意粉好夹。另外仲有两三块Parma Ham，超正！明太子海鲜Pizza ($118)：日式Pizza，D海鲜都足料。明太子味唔算好出，不过整体嚟讲嘅味道都几得意，有新意。柠檬蛋白批($58)：佢嘅蛋白整的软绵绵好好食，配搭开胃柠檬批，一流嘅甜品。