金屋泰國菜館

营业中

休息中

经过见到门面都唔错，所以同朋友入咗去食晚饭。我哋两个人，叫咗总共四样嘢食，仲有两杯嘢饮，加埋甜品，都系大约500几左右。首先叫咗个泰式小食拼盘，入边有四款唔同嘅小食，分别有香脆嘅泰式春卷，四件虾饼同埋鱼饼，仲有两吋串烧，小食嚟讲佢好足够，一个拼盘有咁多款唔同嘅小食。再叫咗一个生虾刺身，啲生虾只只都啖啖肉好厚，我仲食咗少少佢放底嘅椰菜丝，啲虾仲好新鲜。仲有马拉盏炒鱿鱼通菜同埋鲜虾金边粉，鱿鱼非常之鲜甜仲好爽口，而通菜系非常之嫩，唔会觉得佢好老。鲜虾金边粉，每只虾都非常之弹牙爽口，金边粉仲有好香嘅茄汁味，摆盘当然都非常之靓啦。我哋仲叫咗两杯嘢饮，一杯系椰汁三色冰，另一杯系椰汁沙冰，我超级钟意饮三色冰，因为佢𠮶啲粒粒又烟韧得嚟又爽口。最后糕点可以自己任拣，$5一件，我拣咗椰汁粟米糕同埋椰汁珍多糕，粟米糕个口感比较特别，因为粟米嘅料比较多，所以佢嘅口感好多粟米衣，反而珍多糕比我想像中唔同，好有椰香味同埋烟靭。