桔梗 (已結業)

平日约六点到访，店外已经排左十几个人，想食记得要订位。餐厅嘅楼底好高，即使当晚好旺场都唔会觉得局促，楼上仲有水烟食添。软壳蟹小汉堡:小汉堡用左甜面包几特别，涂上牛油后烘脆，底层食落有啲似蛋糕仔，软壳蟹炸到好脆，加上沙律酱同紫椰菜，邪恶又滋味，配菜仲有炸鱼柳，食到最尾仲保持到脆身唔干，鱼柳个酱汁似乎系蜜糖芥末酱，可惜食落都系同沙律酱差唔多，可以考虑下配其他汁营造对比。番茄培根松阪猪炖饭:欣赏佢无煮到淋晒，饭粒有咬口，番茄酱味道偏甜，份量够捞匀成个饭，加埋流心蛋啲饭粒就更湿润，食食下发现个饭仲加左啲烘过嘅藜麦，脆脆地增加口感，猪颈肉有好多块，呢个好食！鲜奶抹茶:饮品就普普通通啦，冲出黎个色比较哑，果然奶味凌驾茶味，个拉花本身几靓，系我地摆耐左变成咁嘅样。