生記飯店

营业中

休息中

得到契B仔一家邀请，抱住期望一试呢间连续十一年得奖米芝连，以怀旧菜式闻名嘅高价粤菜馆。乳猪全体，无肥膏而且皮够薄脆，一赞。莲藕饼个人认为只属一般。姜葱蚝姜葱爆得好香，调味亦恰好，好味。酥炸生蚝，见到炸浆有啲大旧，加上呢排食得太多热气嘢，我无试。枸杞猪膶，猪膶似厚切牛舌般咁厚，口感好滑，有惊喜，招牌菜之一。虾胶满满嘅虾多士，面头铺满芝麻，能做到多士唔油腻，跟甜酸汁好匹配，值得一试。古法蒸鱼肠，以陈皮僻去腥味，我只食到陈皮味同蛋，但食唔到鱼肠，反而食到好似有叉烧～吓？怪怪哋。小食之一椒盐豆腐，无乜味。三黄烧鸡，鸡唔肥腻且有咸香味，唔似一般烧鸡或炸鸡，食得出厨师嘅用心。蒸咸鲜，马友鱼好滑，香葱加咸鲜味如配饭或粥会好夹，可惜已经太饱。又一招牌菜梅子蒸蟹，好新鲜嘅煮蟹方法，但就盖过蟹嘅鲜甜，不过梅子味调教得好好，好醒胃。最后用白糖糕作结尾，无过度发酵𠮶种酸味，个人觉得甜咗少少，充满怀旧味道嘅一餐，可惜有一点点名过于实，值得一赞侍应服务好殷勤。