蓬萊咖哩屋

营业中

休息中

餐厅提供不同人数嘅预设套餐，我就拣咗二人餐（$318+10%）。餐前送咗两片脆片，青色酱十分清爽，腌红萝卜、腌洋葱酸酸哋好开胃。餐汤（鸡肉忌廉汤，浓度适中，味道不错）、咖哩角（热辣辣，外面松脆，里面咖哩薯蓉香味重）各要咗一份。羊肉咖哩，要咗微辣，咖哩香味重，而且有蕃茄底，甜甜辣辣，多重口感；羊肉大约有五/六件，有羊骚味但唔重，肉炆得好淋，而且唔肥，好食。蒜蓉烧饼，热辣辣（辣手），蒜味唔太重，点咖哩一齐食冇得输。串烤五香鸡件，即叫即做，铁板上，鸡件外面香口、内里有肉汁，酱料腌味好惹味；连埋铁板底嘅洋葱、椰菜丝、红萝卜丝都劲入味，正。清炒时菜，用咗不少香料炒，好惹味。印度黄饭，米粒长，干身，捞咖哩啱哂。餐饮要咗2杯啤酒，跑完啤一啤，爽爆。呢餐食得超满足，食物质素又好，价钱又合理，绝对值得推荐。