圃公館 (已結業)

打边炉就无分四季，但尽量每次都去啲唔同嘅火锅店，俾啲新鲜感自己。是日约左个朋友食晚饭，佢仲介绍左个新朋友俾我地认识，可能大家都钟意食，特别好倾，期待下次再一齐去揾食。我地拣左位于湾仔帝盛酒店嘅圃公馆，啱啱就喺湾仔铜锣湾中间，我地落左车都行左一阵先黎到。餐厅环境系中式格局，以圆枱为主，感觉好光猛企理。餐牌既供应火锅，亦有小菜，不过我地为火锅而来，就唔多睇有咩小菜食。平日晚上，以呢个位置而言，都有比我想像中多嘅客人，稳阵啲就最好预约啦。酱料：火锅汤底有基本、传统嘅猪骨、麻辣等，亦有药膳鸡、海鲜、酸菜鱼锅等，定价$148-368。配料有海鲜、牛、猪、鸡、羊、丸、饺、滑、蔬菜、面食等，选择多样，定价中上。不过好老实讲，而家好多餐厅打个边炉都唔平，而家人均三、四百蚊，环境就得体啲。虾兵蟹将锅 $288平时冇乜几何会拣海鲜汤底，唔系太舍得，但今日见呢个锅几吸引，价钱唔算贵，加上有几个人分享，又试一试。上枱以类似干锅形式，一锅两食，先食锅底，再加汤打边炉。锅底丰富，有蟹、虾、青口、大花甲等配料，每人都试到啲。虽然蟹就唔算好大只，但都有啲肉食下。仲有埋花甲，新鲜干净冇沙，啖啖肉；虾就几只，都相当新鲜。