王子私房菜

营业中

休息中

位于Yoho Mall嘅王子私房菜，当其他中菜馆门口都人山人海时，佢竟然唔使等位，入面空间唔大，但座位阔落，唔会同隔离枱太逼，坐喺落地大玻璃窗旁，自然光照入嚟心情都大靓，呢度啲点心价钱偏贵，可能就系少人嘅原因吧，但其实系值得的，因为真系好食！有质素！呢度有得拣荞麦茶好特别！韭黄鲜虾肠（$48）一共有4条，每条有2只虾，啲虾真系好大只！仲要系爽口嘅！肠粉都好滑！话梅蒸猪手（$35）猪手好少骨，唔会太肥，但仍食到有胶质好黏口，话梅味好香好浓！翡翠带子饺（$38）入面有带子有虾，好大粒好足料，再加埋蔬菜，食完都唔会漏，块皮都唔厚，清新之选。陈皮牛肉球（$30）相对普通啲，但牛肉都好滑同好淋，无筋无渣。姜葱虾籽海参捞粗面（$138）真系真材实料，大大旧厚肉海参，一啲都唔就住咁落嘅虾籽，略嫌粗面淋左少少，但仍然好味！香滑芝麻糕芝麻味好香浓，但比起菲林芝麻糕，我会更钟情后者，哈哈。