上岸料理 (已結業)

尖沙咀棉登径不嬲都出名多餐厅，今次就去咗呢间日式小店，几有惊喜。店员为我地介绍今日嘅新鲜食材，最后挑选左呢几样: 首先有熟萤光鱿鱼，熟鱿鱼食落粉粉地，混合沙律酱，青瓜片，海带同芝麻，口感特别又清新。然后要左一个四款刺身嘅拼盘，四款鱼都好特别唔系经常有得食。有黑鯥鱼，连子鲷，叶血引，彷佛鱼。全部鱼都十分鲜甜，系食得出嘅新鲜！个人最喜欢彷佛鱼，薄切彷佛鱼配合酸汁，又爽又弹牙。然后就要左我最爱嘅清酒煮文蛤蚬，蚬肉超级鲜甜，一粒沙都冇。然后就到串烧，今次要左烧鸡翼，鸡皮烧到好香脆，冇晒皮下脂肪，食落一啲油腻感都冇。而家肉仍然保持都好嫩，仲有汁！最后我呢个饭桶要左份烧饭团，估唔到冇馅嘅饭团，经过烧完之后系咁好食。外层脆卜卜，有焦香但系冇𤓓味，好好食呀！而且呢度服务仲非常好，店员10分用心介绍每一种食物，上菜前同埋食完饭之后都准备左毛巾抹手，同埋一杯暖茶，好窝心。