i kitchen (已結業)

之前lunch time同同事去咗附近嘅工厦西餐厅食嘢， 呢度比较隐蔽，去到门口见到佢张餐牌同埋先认得。 餐厅里面嘅气氛同外面好唔同，有一种舒适休闲嘅格调。基本上晏昼只有lunch set menu，所以我哋买咗几个套餐。佢个餐汤系甜薯汤，但系因为天时暑热，我唔想饮热嘅汤，所以就叫咗沙律。佢个沙律系菜蔬沙律，用嘅汁系沙律醋。天气太热嘅关系，所以我都一定要叫冻饮。我叫咗杯是日特饮，系味道十分香甜清新嘅苹果茶。我个friend叫咗布根地红酒烩牛肋肉($98)。佢肉嘅份量都几多，汁嘅味道非常之浓，所以啲肉好入味，配饭食好开胃。我就叫咗个芥末蜜糖焗咸猪手($98)。呢个都系好入味，但系因为有蜜糖，所以除此之外仲稍微有少少香甜嘅味道，而且肉质非常之嫩滑，容易入口。最后每个餐都会送一份甜品，今日嘅甜品系蓝莓芝士饼。芝士饼上面嘅装饰系提子，好特别，好少见。佢嘅芝士味浓度适中，唔算好漏，好食。饼底嘅牛油味好香。埋单大约每人$100左右，因为好齐全，而且都几好食，所以都算几抵。另外，服务方面，可能系因为lunch hour，要方便上班族，所以上菜上得特别快。如果赶时间，但又想食好啲，呢度都系唔错嘅选择。