金凱小廚 (已結業)

估唔到系大围呢个屋邨冬菇亭，都有d CP值咁高既鸡煲放题！食物方面有惊喜，本身以为咁既价钱唔会太好食， 但鸡煲味道真系不错，有麻辣既感觉又唔会太辣，酱汁再加埋d洋葱好惹味！佢上台既时候基本上都熟左，只要加热几分钟就食得，啱哂超级肚饿既我地！本身以为打边炉系直接用鸡煲个底料再加水，点知仲可以拣汤底！真系超值啊！注重美颜养生既我地，当然拣左花胶鸡汤，味道清清地都唔错，用呢个汤底食出几种肉既鲜味。串烧味道不错，肉类唔会烤得太老，味道偏甜，咸淡适中，唔需要自己额外加调料已经好够味。蘑菇都唔会烤得好干，食既时候仲有d菇汁，不错不错。侍应既服务态度都几好，佢地上菜既速度好快，由落单到上菜唔洗几分钟就有得食，另外即使有好多客要serve，我跌左几次筷子，叫佢地再比过都仲好有耐性。之后佢地见我地食肉食得饱饱地，仲主动问我地需唔需要菜篮，颇贴心。环境都ok，餐厅内虽然人多，但个场地都宽阔，台与台之间距离唔会好贴近，所以唔算嘈杂。而且有个饮品柜比大家任君选择，等大家可以解下腻！