Co-Dining Space (已結業)

同事介绍有间喺尖沙咀嘅楼上西餐厅，虽然位处闹市，但布置清新，食物都唔错，所以就过去试试。我同朋友决定叫1个小食，加2个主菜 share。Co-DS 小食拼盘 - 呢个拼盘有水牛城鸡翼、意大利牛肉丸、德国肠、炸鱼手指同炸洋葱圈，样样都有啲，2个人食就刚刚好。鸡翼辣辣哋酸酸哋，牛肉丸咬落有口感，德国肠食到香草味，炸鱼手指系吉列𠮶种，点茄汁食就最夹，洋葱圈外皮好脆，中间嘅洋葱好甜，炸物完全唔觉油腻，再食埋加咗黑醋汁嘅沙律菜，即刻觉得无咁热气。西班牙黑毛猪串烧配甜番薯条 - 黑毛猪保留咗好多肉汁，食落好腍，中间夹咗蕃茄仔，下面就有薯蓉，仲有我最钟意食嘅番薯条，加埋配上嘅肉汁，好惹味! 招牌黑松露菌面包蟹盖意大利饭 - 食到黑松露味，饭里面加咗蟹肉同蟹膏都食到，意大利饭炒得干身香口，食落轻盈唔会腻，原本睇落以为好少饭，但食吓食吓都够饱，唔错!