仁芝初

营业中

休息中

啱啱喺旺角食完西餐，想揾间中式糖水暖下个胃，因为呢几日都好冻，跟住行行吓就见到呢间仁之初，个名好得意！入边望落都好光猛好新净，门口有餐牌介绍中式糖水同埋佢哋嘅特色糖水。坐低店员嚟落单𠮶阵时都有介绍话呢度嘅甜品系每日鲜制，而且性价比高。咁我哋就叫一个古法养颜炖桃胶加三粒芝麻汤圆同埋一个法式紫米露。个桃胶同汤圆上枱先，汤圆有三粒，每一粒都好香芝麻味，个皮都唔会太厚，而桃胶每一羹都有好大旧桃胶系入边，好足料，饮落好和暖好舒服。另外一个就系法式紫米露，入面有椰汁，啫喱，紫米露同埋炖蛋。个椰汁同紫米露沟埋食好正，仲食到好多紫米系入边。啲啫喱系士多啤梨味，呢个配搭都几得意。最后个炖蛋呢就比较实净啲，都好够蛋味。虽然佢细细份，食完都好饱下，有机会都推荐大家嚟试吓。