影片
更多
2014-07-27
765 浏览
近期喺网上得知旺角新开左间新嘅拉面店，名叫「雷拉面」。作为拉面迷嘅小弟已经快速试完店方所有口味嘅拉面啦~~~!!!店方四款唔同口味嘅拉面，究竟有咩特别之处？ 以下会逐一介绍:「雷」卖相方面: 配上博多风拉面传统嘅配料，简单自然~叉烧方面: 选用腩位部分，肥瘦比例为6:4，类型为「烧豚」。叉烧经卤水浸过再将表面用火炙烧， 采用薄身切法，所以食落去非常入味又冇出现「鞋口」情况。唯一要弹嘅系肉质比较松散...面条方面:店方选用日本小麦粉，本地面厂制造。小弟拣左「直面」，因为小弟觉得直面配猪骨汤底系最好嘅配搭! 而且直面挂汤会比较集中...食落去比较爽快。 硬度拣左「硬」。因为拣「硬」面嘅话，浸汤时间会比较长，面唔会太快变「淋」。面质唔错~不过多番啲麦香就更加好... 味玉方面:图片所见，几乎全熟...但系第一次帮衬嘅时候食嘅味玉系相当唔错...依只应该系失
店方四款唔同口味嘅拉面，究竟有咩特别之处？ 以下会逐一介绍:
「雷」卖相方面: 配上博多风拉面传统嘅配料，简单自然~
叉烧方面: 选用腩位部分，肥瘦比例为6:4，类型为「烧豚」。叉烧经卤水浸过再将表面用火炙烧， 采用薄身切法，所以食落去非常入味又冇出现「鞋口」情况。
唯一要弹嘅系肉质比较松散...
面条方面:店方选用日本小麦粉，本地面厂制造。小弟拣左「直面」，因为小弟觉得直面配猪骨汤底系最好嘅配搭! 而且直面挂汤会比较集中...食落去比较爽快。
硬度拣左「硬」。因为拣「硬」面嘅话，浸汤时间会比较长，面唔会太快变「淋」。
面质唔错~不过多番啲麦香就更加好...
味玉方面:图片所见，几乎全熟...但系第一次帮衬嘅时候食嘅味玉系相当唔错...依只应该系失手之作...
(P.S:上图为第二次帮衬嘅时候影嘅...)
汤底方面:浓度合格...正常人接受到嘅程度。当然浓度又未去到「重口味」程度。
饮落去顺口唔会太咸，汤底表现令人满意~
------------------------------
「赤雷」卖相方面:四款口味之中颜色最鲜艳~抢眼度十足!
配料方面:除左基本嘅叉烧之外，仲有鲜蕃茄蓉同埋三文鱼籽。
抵赞嘅系三文鱼籽大大粒，咬落去令人觉得好满足!
面条方面:小弟都系拣左「直面」。蕃茄味汤底配直面系一个唔错嘅选择~
啲面夹埋三文鱼籽一齐食嘅话，咬口度即时升!
不过小弟食完「赤雷」又觉得蕃茄味汤底配「曲面」都可以一试~
味玉方面: 味玉表面经卤水浸过，所以十分入味!流心程度高~ 同第二次食「雷」嘅味玉实在差太远...
(P.S:上图为第一次帮衬嘅时候影嘅...)
汤底方面:一开始饮嘅时候会感受到微微嘅辣味...再捞埋啲蕃茄蓉饮嘅时候，辣汁同蕃茄蓉出乎意料咁夹!
辣味同酸味两者中和...令汤底味道提升!
( P.S:钟意食辣嘅朋友不妨点餐叫「赤雷」嘅同时可以剔埋「辛辣酱」，相信味蕾刺激感相对提高~)
------------------------------
「黑虎」卖相方面:黑色汤底之中有橙色蟹籽做衬托，「点缀效果」即时出现~
配料方面:有蟹籽同埋鲜蟹肉，份量适当。因为配料都系用左「蟹」...算系「双重享受」~
面条方面:小弟拣左「曲面」。小弟觉得曲面配浓味汤底会比较好...因为曲面面身会比直面粗少少，挂汤嘅时候浓味会较平均分散系面条上面，唔会一下子俾大量浓味直撃味蕾...不过店方嘅「曲面」面身嘅粗度个人认为未至于叫做「太面」嘅程度，系小弟眼中顶多系叫做「中面」...
叧外一个问题就系店方嘅「曲面」嘅长度不足。食落去间中会有「断」嘅感觉，面身唔够连贯，爽快感下降...
不过剔除长度不足嘅问题，其挂汤能力同直面一样都系相当唔错~而且面同蟹籽一齐食嘅话会有「啪啪声」，咬感相当有趣~
汤底方面:四款口味之中味道较浓嘅一款。猪骨汤同墨鱼汁嘅估计比例为7:3。当然墨鱼汁比例当然系会多一啲...但系饮到落猪骨汤味仍然感受得到。钟意浓味嘅朋友应该会对「黑虎」有兴趣。
不过墨鱼汁系「黑虎」仲有另外一个作用，就系带出鲜蟹肉嘅鲜甜味。吸收左鲜蟹肉吸墨鱼汁嘅浓味，系浓味之中深透丝微嘅鲜甜味。可以算系「黑虎」嘅出色之处!
------------------------------
「青麟」卖相方面:焦点放喺黑鱼籽同带子刺身度~黑白色强烈对比...令人印象深刻!
配料方面:有黑鱼籽同埋带子刺身。带子刺身大大块~正呀!亦因为咁，四款拉面嘅定价入面，最高嘅就系「青麟」。理由当然系用左价钱比较贵嘅带子刺身黎做配料啦...不过$86可以食到依个质素嘅带子刺身，个人觉得合理。
面条方面:小弟拣左「曲面」。不过试左个菠菜汁汤底之后发觉现阶段嘅「青麟」嘅味道确实较淡...再用曲面品尝只会将菠菜汁汤嘅味道变得更加分散...
所以现阶段嘅「青麟」，小弟会建议大家用「直面」品尝...等菠菜嘅味道集中番。
叧外，黑鱼籽嘅发挥感觉上同「黑虎」嘅蟹籽差唔多~同啲面一齐食嘅话都系会有「啪啪声」。
汤底方面:应该系四款口味之中实力较弱嘅一款。原因系菠菜比例较少...因为小弟系饮依个汤底嘅时候，只系感受到微微嘅菠菜味道...此处系败北之一。
虽然汤底弱...但系其清淡感同带子刺身嘅清意外地甜洽到好处!
带子刺身沾左少少菠菜汤，菠菜汤变成左调味料，令到食带子刺身嘅时候会多左一种蔬菜味道。依样算系为「青麟」嘅汤底弱问题弥补番少少分数~
所以小弟建议店方稍微提高些少菠菜嘅用量，平衡番猪骨汤嘅比例。改良过后，「青麟」个人觉得应该都会几受钟意清淡口味嘅朋友欢迎~
------------------------------
同场加映:第二次帮衬当日小弟有幸得到店方徐师傅嘅邀请参观厨房。(上图可见正系煲紧嘅猪骨汤火候十足!绝对系真材实料!)
------------------------------
略评:
「雷」:猪骨汤底基本功出色! 但系食惯左「重口味」嘅小弟黎讲...浓度可以再提高~
「赤雷」:四款口味之中番食指数最高~因为味道真系有惊喜!
「黑虎」: 墨鱼汤、面同蟹籽嘅配合...值得一试!
「青麟」:大大块嘅带子刺身系其卖点!整体配搭就好似「清淡口味+高级配料」版本嘅「黑虎」咁...
总结:
「雷拉面」应该系喺香港少数可以食到用刺身类食材黎做配料嘅拉面店~
对于钟意试新野嘅香港人黎讲，「雷拉面」绝对系近期推介之ー!
店内格调充满日本小店风格~店员服务态度良好~
小弟亦趁住徐师傅有空档嘅时候同佢大谈拉面经，交流意见~徐师傅好好礼貌，令小弟对店方嘅印象分大増!
「雷拉面」嘅表现小弟会俾「中上」。期待有进歩空间~值得一赞嘅系饮完成碗汤完全冇出现口渴情况~
期待店方可以将上述小弟提出嘅问题加以改善...相信不久「雷拉面」就会成为旺角区嘅拉面新贵!
张贴
