德美壽司 (新都城中心1期) (已結業)

今日经朋友介绍下去咗宝琳嘅德美寿司，餐厅入面接近full晒，好彩出面冇咩人排队，所以好快就入座。餐厅套餐选择颇多，例如鱼生丼、饭类、定食，送埋沙律、甜品同汤，所以我哋每人叫咗一个套餐。首先上咗沙律同面豉汤，沙律有炸面包粒同一片鱼生，几新鲜。面豉汤咸淡适中，除左海苔，汤里仲有豆腐粒。主角出场啦！就系德美海胆鱼生丼。估唔到鱼生分量超多，有三片三文鱼，两片油甘鱼、两条蟹柳、大量海胆、蟹籽同印住「德美」两字既甜蛋。刺身非常厚身，海胆creamy，鱼生肥美鲜甜，油甘鱼肉质爽口，最特别嘅系醋饭内有干坤，竟然有冬菇，为醋饭加添一份独特嘅菇香味。女友叫咗银鳕鱼西京烧定食，银鳕鱼油脂高，但唔会话太油腻，肉质相当嫩滑，两大片分量非常足够。除此之外，我哋亦叫咗四款串烧，包括烧牛舌、烧鸡软骨、免治鸡肉棒同鸡皮。牛舌非常爽口，调味啱啱好。另外，免治鸡肉棒表面微焦，啖啖肉之余有咬口。鸡皮烧到脆卜卜，好正！最后以甜品作结，仲要系我最钟意嘅芒果味。