漁吉海鮮丼專門店 (已搬遷) 新店位置

同几位组员一朝早经历完好大压力嘅present，决定食lunch一定要食好西，好好庆祝一下困扰左几个月嘅project终于完结啦。住九龙嘅组员推介不如去九龙城豪一豪，食个鱼生丼饭。唔系佢带路，我都唔知原来九龙城除咗食泰菜之外，原来仲有间出色海鲜丼。一坐低，店员就放低一壶水，倒出嚟先发现系味噌汤，而且系无限斟，以汤代替左茶。大家都做到心力交瘁，唔想用脑，跟晒大佬叫晒 渔吉特选丼饭。四碗 特选丼到！材料非常丰富，有十多款鱼生/配料：带子，三文鱼，三文鱼籽，赤虾，海胆，油甘鱼，星鳗，比目鱼，樱花鱿鱼，蟹籽，玉子。每款刺身都好新鲜，星鳗同海胆有轻转火炙过，带点焦香。丼饭已经加左醋调好味，唔洗点再落豉油，而且饭面除左鱼生片外，仲舖左大量蟹籽同三文鱼籽，每一啖都好满足。大佬仲叫多左个小食，炸樱包虾豆腐。呢个出奇地好味，令我感到好惊喜！豆腐切到一粒粒，岩岩好可以一口食晒，外层系俾满满嘅樱花虾包围住，外皮脆得嚟带点虾嘅咸味，入面系滑嘟嘟豆腐，好味道，光速被大家分晒！食饱饱，叉满电，要番去继续努力工作。