峇峇娘惹 (MOSTown新港城中心(4期)) (已結業)

剪完头发，时间上有啲尴尬，因为系啱啱过咗下午茶时间，但食晚饭又太早，于是就搭车去马鞍山商场行吓街先。先去超市巡咗一轮，一落楼就睇到呢间餐厅，反正一个人，咁就求其食啲嘢就算。晚饭餐牌上都系喇叻、肉骨茶、鸡饭等，睇到隔离抬碗叻沙好似几好，所以我就嗌咗碗鱼蛋渗渗喇沙。因为喺晚饭，叫嘢饮有优惠，我就加咗三蚊要咗杯冻薏米水。碗渗渗喇沙当然系面同米粉两沟，面嘅份量极多，唔怕食唔饱。其实呢碗嘢冇乜料，只有啲芽菜，几个豆卜，半只鸡蛋同埋四粒鱼蛋，好在啲鱼蛋都叫做爽口，但系60几蚊一碗，其实绝大部份都系面条。至于𠮶汤底真系好一般，我嫌佢冇乜味道，只系个样似叻沙，亦都唔够辣。唔记得咗讲，上枱嘅时候有半粒金桔摆喺个汤羹上，只不过得半粒，沟埋落啲叻沙汤内食唔到任何变化。呢间餐厅唔系差嘅，只不过今晚叫得唔好，如果真正想食娘惹美食，咁就真系唔好叫呢碗嘢啰。