スーパー丼 (駱克道) (已結業)

约咗个friend出铜锣湾lunch， 天气好热我哋一致赞成去食日本刺身丼。 拣咗骆克道嘅Superdon， 人气刺身丼店， 午饭晚饭时间更加座无虚席。我哋拣咗下午茶时间， 人总算少一点。有各种午市套餐， 自选套餐，厨师精选，厨师发板都有。。 相当专业多选择。难得嚟到 试咗 特上北海道丼$198（帆立贝，三文鱼子，海胆，吞拿鱼腩蓉，油甘鱼）太好了有我最爱嘅北海道海胆。 份量虽然比较少， 但系非常鲜甜， 已经成为丼里众多刺身嘅主角， 完全冇甘涩味。两片油甘鱼都系厚切， 鲜甜，肉质有弹性， 食落更有油甘鱼独有嘅鱼香~~帆立贝一开二，相信原粒系好厚嘅。 每片中间夹杂著 一片鲜柠檬， 唔会沾上酸酸嘅柠檬汁但又有清香嘅柠檬味提升鲜味。吞拿鱼蓉都选用较多鱼油的部分， 食落甘香有鱼油香，幼滑冇筋， 配上刺身酱油加入米饭中极滋味。饭嘅比例啱啱好， 唔会多饭少𩠌， 寿司饭嘅醋下得刚刚好，米粒软熟香甜， 饭质不干不烂。 当然全店都使用日本产米。特上油甘鱼丼 $98有五至六块油甘鱼铺满丼上， 虽然并非厚切但肉质非常鲜甜唔腥。每款套餐都奉上 面豉汤和沙律前菜。面豉汤里有好多材料， 有一些有鱼味嘅腐皮，非常香。