龍門冰室 (已結業)

话说行经观塘有点肚仔饿，但又未饿到可以食晚市套戏既程度，心谂不如揾门茶餐厅试下啦！见到龙门冰室最近开左好几间分店，门面又干净企理，一于入去试下啦！入到去仲有一两张吉枱，店面姐姐都系强调我一个人要坐去已经有人既卡位填满左先，都冇乜所谓既，都算阔落。不过坐耐左发觉冷气好细，焗到标汗。常餐鲜茄浓汤通粉感觉好吸引，一睇个名口水都分泌出黎，冇理由唔叫既！早餐同下午茶时段只系收28蚊，晚市都只系36，仲有两样配料拣，劲抵食！我就嗌左鲜茄浓汤通粉，配北海道牛乳炒蛋同肠仔，加两蚊冻柠茶，最基本配搭，一定稳阵啦！点知，原来两个配料放埋落碗通粉一齐上，唔系分开上，啲汤浸满哂就溢出黎。好似执埋一碗咁，卖相真系一般味道方面，好淡，系完全冇鲜茄浓汤味既😅 就咁呷一啖汤真系冇味道，而且好稀，本身仲期待会有酸酸甜甜既感觉～不过配料算用心，炒蛋大大片，对折完都仲可以填满个碗咁大块，肠仔都有两条，味道都不错。就系个汤底实在系扣分之作～～～期待可以有更加鲜甜既鲜茄浓汤～～咁抵食如果汤底有改善一定会更受欢迎！