魚蝦蟹 (已結業)

中环一直系拉面界既激战场，要系呢度生存真系要有返咁上下实力，见呢间鱼虾蟹新开无耐，梗系要试下佢乜料子。装修走cafe shop简朴路线，简洁舒适，望下个餐牌就知佢走一个cross over风格，除左有浓虾汤面，又有酸菜鱼米线，仲有港式元素，个老板真系贪心。不过我份人好专一，入嚟就系食拉面，叫左个王牌特大海虾鲜虾浓汤拉面，盛惠188大元，无加一。碗面一来到都几震撼，事关只虾真系好巨大，心谂一定系雪虾，点知搣开虾壳咬佢一啖就知自错左，只虾虾肉弹牙，虾膏劲多，单单只虾都知碗面成本好高。食完巨虾再饮啖虾汤，显得个汤有啲单簿，但饮得出系无味精，面质都几弹牙，不过唔够挂汤。不过碗面仲有两块鱼肉，厚厚既鱼肉嫩滑足味，又系不惜成本既地方，而且个餐有小菜又有生果切粒，足见老板心思，值得一赞。