紫荊閣海鮮酒家 (已結業)

又跟老友记们聚会。正苦恼要去食乜之际，老友食家又再成为本人之苦海明灯，老牧童摇指一点，一班人浩浩荡荡就入嚟一试怀旧菜...冬瓜盅料足之余汤够清，实在难得，诚为夏日消暑妙品...沙律龙凤球以鸡肝及虾作料啄成球状，再沾上芝蔴炸成。够香口，可惜面头沾上厚厚嘅沙律酱，鲜味全盖，大大失色；八宝鸭肉算软糯，馅料亦足，若果味可以调得浓D就更对味...花胶扒时蔬，菜炒得嗦嗦声，花胶炆得够淰，献打得并不太杰，味道清新而不俗....全晚精华所在当然系等咗成二十分钟嘅鸭脚包--- 以鹅肠包住切粒肥义、鸡肝及鸭脚而成，再搽上义烧汁烧而食之。肥义嘅油润；鸡肝嘅粉滑；鸭脚嘅咬口，再加上个微甜嘅义烧汁，真有如天堂美食，吃得不知人间何世..吃得兴起，再嚟个虾炒蛋。虾够弹牙新鲜，蛋亦算系滑蛋。可惜味调得太咸，埋唔到尾...但单系一味鸭脚包已令人叹为观止...