Jubal (已結業)

食友papanana安排第一次饭局，相约六人共进晚餐。店舖十分细小，一定要订台。由于papanana跟厨师Boris相熟，所以由Boris推介。前菜叫左炸芝士，煎蚝，烧带子，鹌鹑同煎鹅肝。炸芝士一般。但煎蚝真系不得了，蚝只肥美，甘香，必食。鹅肝外脆内滑，一样系必食之选。带子鲜甜，鹌鹑肉滑，质数唔错。其实食到呢度已经有少少饱。主菜有羊扒，鹿肉，12oz.肉眼扒。三款扒类劲大份，而且羊扒，鹿肉亦切有六件，相信系跟厨师相熟关系。三款扒都系五成熟，刚刚好，软熟多汁，十分好食。个人最欣赏第一次食既鹿肉，好有膻味，劲好食！肉眼扒亦十分够牛味，值得推介。最后加两款甜品，云尼拿味疏夫里同埋朱古力蛋糕。疏夫里系绝对失准，焗到老哂。反而朱古力蛋糕朱古力味浓郁，够苦涩味，我钟意！因为只带一支酒，系店内多买一支南非Shiraz$240饮得过，送红肉唔错。不过开瓶费要$50支。食物十分有水准，不过厨师Boris好有性格，有坚持。