鹿鳴居 (已結業)

Item: 鹿鳴居
Rating: 2
Author: 奥志雷

Deers Restaurant

此店已改名為新鹿鳴居

16 食记

味道

环境

服务

卫生

抵食

大埔

$51-100

潮州菜火锅粥品大牌档

奥志雷

等级4

2.1K

酒后又乱性，只怪饮醉酒 ﹗在人工智能 AI 系统下再次大散金钱，大大力 order 丰富宵夜呢。夜晚九点半开始饮，未到一点已经醉爆，但依然浑身是劲，仲识赌钱、食宵夜。脑部人手操做已关掉，记忆体同时都关掉，启动 AI 系统打电话去叫外卖，再加赌 poker 输左几千蚊，大出血之夜 ﹗赔了夫人又折兵 ﹗

等左 45 分钟外卖先送到，而且冻鬼晒，只系微暖，依家食冷饭菜汁咩 ﹗离晒谱，火到黎﹗打电话催外卖，老板娘话师傅食紧宵夜要迟少少唔好意思，都无紧要 ﹗但外卖送到黎冻晒，唔系热辣辣就唔得啦 ﹗好明显一早煮好等埋其他 order 先出货，太可恶 ﹗

饮醉酒第 12 个炽天使出现，大食 AI 启动 ﹗狂 order、狂食野，食到停唔到﹗饮左一支半红酒加 shoot Jack Daniel 又开始 high high 地，失控地疯狂点菜 ﹗先黎 5 道菜食住先，转头再 order 多 4 个啦，9 道先够派头麻 ﹗叫成 9 道菜，都唔记得几多钱埋单咯﹗我醒左几十蚊小费过佢，外卖阿姐劲开心，呵呵 ﹗

狂食白灼东风螺，近来真系食上瘾 ﹗壮阳东风螺是也。我最喜爱既菜色，简单又好食，够鲜甜。即叫即烚，热腾腾送到，热到只可以免强拿起呢。好大只啖啖肉一挑射汁，食到成手湿晒，狼狈得黎食得开心畅快 ﹗烚得刚刚好，完全不韧无过火无缩水。不干不鞋，螺头脆、螺身滑、螺尾棉，好好味 ﹗点酱惹味好食，不点酱原汁原味同样清新可口。

鸡丝海蜇，好奇下叫黎试试乍。微暖不热的温度，怪怪的。鞋鞋的鸡肉捞埋半腍半爽海蜇淋上麻油再洒上芝麻，一般的唔难食，叫做试过啰。感觉似上海菜鸡丝粉皮的变奏，一个系麻酱，另一个系麻油。

蒜蓉粉丝蒸象拔蚌仔，蒸得有少许过火，熟了一点点、韧了一点点，幸好还在可接受度，微弹带汁。让索尽螺汁粉丝卷著吃，夹杂蒜蓉、香葱、辣椒，依然食得津津有味。

椒盐猪扒，炸蒜非常香口，我想要碗河粉捞黎食啊 ﹗不过猪扒炸到干硬又鞋，赵到有点刮口添。茄子炆牛仔骨，嫩滑茄子肉完全吸收牛仔骨精华，热腾腾送入口，牛味浓又酱汁香，好味到打冷阵。牛仔骨腌味浓郁而不呛不浊，质地有咬口，满足。

枝竹羊腩火锅，连羊腩火锅我地都外卖，认真食得够招积喇 ﹗坚系羊腩㖞，啖啖嫩肉，骨少肉多开心死 ﹗唔会肥腾腾，又唔会肥膏一旧旧，膻香不嗅不腥不过份。炆得软腍，入口感觉松软，羊皮弹弹而黏著薄薄羊脂，泛著清爽浅浅膻味。

汤汁加入大量配菜肴成，特别浓郁带甜带羊肉香。羊腩跟腐乳酱简直绝配，是但无左边个都唔得，实在太好味喇 ﹗一份羊腩两个食就差唔多，依家五六个人点够分㖞，完全唔够喉，唔会少食多知味啰。送上爽嫩唐生菜。我喜欢待菜叶索晒羊肉汤先卷著大量腐乳酱入口。唐生菜爽到索索声又充满水份，跟羊腩汤既味道特别夹，食到唔停口 ﹗

蒜蓉蒸茄子，大量蓉蒜辣椒将茄子铺得满满已被软棉茄肉找得紧紧，整件啪入口，半滴精华都不漏地尽收肚里去 ﹗辛辣香甜蒜蓉，香气朴鼻，可口极致。

蒜蓉蒸开边中虾，游水虾超级新鲜无得弹，香辣豉油蒜蓉浸著鲜虾肉直冲入口，跟舌头、牙齿不停纠缠 ﹗虾爽味鲜跟蒜香翻腾著，美味啊 ﹗虾汁已完全渗透入垫底粉丝之中，卷著蒜蓉啜晒入口，鲜甜惹味，好鬼正 ﹗

姜葱炆美国桶蚝，只有桶蚝供应，没有本地新鲜蚝呢。肥嘟嘟蚝肉够实净，全熟使到蚝味更香浓特出，煮得无过火无缩水。唯一我不喜欢的就是桶蚝裙边太韧又有渣，食唔到呢。

净猪红，不辣的卤水汁较为清淡，幸好有椒椒油打救。结实淡味猪红在辣椒油上打滚再入口，一咬爆开 ﹗外脆内滑，都满意。够热就会好好食，无浸过火搞到鞋鞋硬硬就更好食。汁液四射，卤水味浓添一点微辣，温度少少烫嘴更是美妙。我唔食韮菜的呢，想要生菜底。谁知老板娘厌麻烦啰，死都唔肯帮我做，韮菜贵过生菜啦，加钱都唔肯 ﹗近来成日挂住猪红，好耐无见喇 ﹗

菜胆鸡半只，真系咁多食？居然只卖剩半只，点够食呢？无办法都要照叫架。劲孤寒，比得几旧芥菜胆，又卖晒？非常干腍甘甜好好味。但只大肥鸡肥腾腾，鸡皮劲厚又收埋大量肥膏，食到成口油，鸡肉又鞋又干。鸡汤芡调杰挞挞，做汤羮咩，试一次便够。

椒盐濑尿虾，炸得虽然有点油腻，但香喷喷 ﹗蒜香飘飘，还夹杂著炸虾芬芳气味，口水直流，我唔客气喇 ﹗真系唔错㖞，虾肉湿润嫩滑结实，鲜甜无比可口，部份濑尿虾仲有甘香硬膏添呀，坚正 ﹗系细只左少少啰。最初想食炸乳鸽架，卖晒之麻。点知推介濑尿虾，称游水好新鲜生猛，就叫黎试试啦 ﹗谂深一层，我想食雀㖞，关海鲜咩事呢？

胜瓜炒肉片，皮爽肉滑啊，肉汁渗入瓜肉特别香甜好味道，肉片炒得香口有赵头，夹住胜瓜同吃，滋味无穷。近来经常脑里面浮现依道菜，细细个时阿妈成日煮架呢。搞到我想食几日架喇，所以专登操完泰拳返屋企冲个凉再走落街食野。

剁椒蒸鸡，未试过想试试，order 前已心谂会唔会又系比头头尾尾呢？点知真系估中左，全部都系鸡背脊，仲有一只鸡翼加两只鸡翼尖添 ﹗居然收 HKD60，系咪过份左呢 ﹗无味雪藏鸡，骨多肉少、骨杉杉、肥腾腾、油淋淋，鸡肉又鞋烚烚，以后要记得唔可以叫鸡呢。

姜葱爆田鸡，最好食系白滑两条腿，大腿肌肉结实劲弹，沾上微辛姜葱芡非常可口。其他部份虽然肉不多，但同样肉质滑滑的，损下汁、损下肉都别有一翻风味。

菠萝生炒骨，突然好想食，好想食酸酸甜甜既食物 ﹗炸得外脆内嫩又啖啖肉，骨少肉多好满足。松化外层索晒甜酸汁，还轻轻散发著青椒洋葱独特的味道，活脑醒神又开胃，越赵越想食。

红酒焗蚝，伴碟西兰花比焗蚝更好食㖞 ﹗鲜甜多汁又爽脆，唔会腍劈劈或带草清味道。蚝豉？那么特别，还以为会用上本地生蚝或美国桶蚝添。生晒金蚝将鲜蚝味道完全锁住在其中，一咬开甘甜无比，松化软软的质感非常舒服。红酒汁泛出微弱葡萄酒香气，还算可以。

椒丝腐乳生菜，有镬气，我钟意 ﹗味道香浓，我喜欢﹗腐乳混辣椒够惹味香浓，简单又好好味 ﹗鲜爽到索索声，劲脆又充成水份，挂上浓浓腐乳汁再夹埋椒丝丝大注大注地啜入口，食得够霸气，非常满足呢。

中式牛柳，好耐无品尝，突然好想食。热辣辣酸味突出，最后带一丝甜甜余韵。肉质十分有咬口，给点牙力吧 ﹗牛味浓又腌味得宜，几好食架㖞。

白灼花螺，真系太新鲜太好味喇 ﹗要叫两客先够喉，连酱都可以悭返，鲜味非常，螺汁丰富而且爽弹无得弹，点可能停得口呀。比起东风螺细只好多呢，虽然鲜味出众亦弹牙多汁，但无咩肉食。半斤已经好多粒，要吉成几十下好困架麻，大只的话只需吉十几只就完成啦 ﹗

专登 order 要大只啲架，好新鲜爽甜，最紧要食到条尾呀，口感同味道同润差不多，由细到大都挣住食架 ﹗九孔鲍又好、螺又好、帆立贝又好，有朋友仔唔食，比晒我唔好浪费呀，好味道 ﹗

豉椒炒蚬，真系唔好再叫喇，蚬肉细细粒劲削，仲完全无味道，完全无鲜味，淡而无味 ﹗一早汆完水备用，有 order 就落镬兜均个汁，烚走晒鲜味同海水味。好明显系汆完水再兜豉汁，一点味道也没有，只有豉椒味，差差差 ﹗蚬肉虽嫩，不过质地似足赵紧香口胶。煮到过熟，really bad ﹗

炸鸡软骨，炸得干爽香脆，难得不油腻，还可以。炸墨鱼饼，毫不弹牙，腍劈劈，口感松散，微弱墨鱼味道，算炸得松脆，沾上大量泰式鸡酱唔难食。

椒盐鲜鱿，最爱松化不硬薄薄的炸浆温柔地包著鲜鱿，香口非常又微脆不刮口。鱿味鲜甜超卓，弹弹质感中又带少少咽韧，掉在喼汁上打滚，让喼汁渗透脆浆更是可口。

卤水鹅，好难一间潮州打冷既卤水鹅可以做得咁差 ﹗卤水不鲜甜又咸又浊，完全不香不甜美，鹅肉一夹即散，炖肉一样，不嫩不滑不弹，鹅皮又腍劈劈，估计浸过火啦，好难食呢。

清蒸游水活石蚌，以前成日以为石蚌及笋壳系贝壳类，原来系鱼黎架㖞。游水海鱼劲生猛，即叫即㓥 ﹗鲜鱼味道出众，不能掩饰的美味，要成 HKD120 条架。啖啖肉无细骨，海鱼味浓、肉质实净，带著鱼汁豉油，满意满意。

芥菜豆腐鱼头汤，份量都唔少㖞，足足一窝呢。热腾腾，几好饮㖞，虽知味精不少。幸好鱼头都有肉食下，芥菜甘甜爽爽的，豆腐配上豉油都可以。

冬菇扒芥菜胆，芥菜非常鲜嫩多汁，甘甜无比，好食到不得了，抢呀 ﹗冬菇嫩滑爽口，弹到飞起，香菇味浓，食唔停口。