Das Gute (已結業)

做完运动，奖励下自己，去买件蛋糕，落到地下LG，见有Das Gute新开，佢嘅面包我好钟意（蕃薯包 ），西饼未试过，新开张环境光鲜，光猛干净，已经晚上10点，依然有好多款面包，西饼只有几款，其中一款「杂莓芝士蛋糕」$38，卖相漂亮,同店员要了一件，店员用个硬底纸袋袋住件饼比我，可以用八达通比钱方便，返到屋企，打开个袋，件饼完整无缺！ （都惊个纸袋唔够保护）附送胶叉，呢个几方便，外面望落松软，好像雪花咁，但食落唔得，偏干，一啲都唔似慕丝，似普通海绵蛋糕！ （唔知系放雪柜嘅问题，抽干了？）而亦食唔出简介咁讲有两种芝士！系食唔出有芝士味 ，面头红桑子新鲜，白朱古力香甜，中间馅料简介话有樱花及云呢嗱嘅莓酱，我只食到莓味嘅酸酸甜甜，另外𠮶两样味道都唔特出！不过莓酱味道系好味嘅！蛋糕底有块饼做托底，脆口牛油味重！好味！但整体系失望嘅！好普通嘅西饼，唔值得呢个价钱！店员爽手，我要买饼时，近我嘅店员刚有客，另一个店员即刻补位，亦好快手！ 呢度都系买面包好啲！