天府人家

营业中

休息中

难得亚仔去咗串门子，两公婆二人世界，即刻揾新嘢试吓。见到间舖系谢斐道楼上舖，心谂星期日晚应该水静鹅飞，点知全院满座，好彩有订枱。我哋叫咗夫妻肺片、凉拌木耳、担担面、椒麻腰花、老麻抄手、水煮牛肉、一罐可乐。唔知系唔系漏咗单，等咗半个钟都冇得食，见到人哋迟嚟嘅都上咗菜，问吓服务员，转头D𩠌就上啦。夫妻肺片带甜味；凉拌木耳微酸微辣好清新 ；担担面老公唔记得搅一搅，觉得淡咗小小，但都OK，下次再试清楚 。老公钟意食麻，佢觉得椒麻腰花、老麻抄手好味到冇朋友，我觉得腰花本身的鲜味欠咗D，同食到一片有压味，而老麻抄手真系几好味，而且麻到成个嘴痺晒。水煮牛肉好好味，好耐无食过觉得满意的水煮牛，呢度我哋觉得好啱胃口 ，特别钟意里面的薯粉（希望冇写错）、菇、瓜片，如果牛肉可以多小小就好啦。埋单送甜品红豆沙，红豆沙冇起沙，仲应该落咗生粉水，但甜度可接受；以往食完川菜都想食雪糕中和下，但今次食完红豆沙后，竟然想食雪糕的欲望无咗。因为D食物啱胃口，老公话原谅上菜慢一事，整体来说除咗落单果位先生好似不在状态，跟著 follow 我哋的女服务生都好有礼貌。已经 What's App 咗比D朋友约埋再嚟食过。