喜聚火鍋雞煲專門店

营业中

休息中

成日系社交媒体见到喜聚卖广告，成班男人睇下睇下，就心郁郁想试下，今晚终于约齐人上去会一会佢。餐厅有四个放题选择，只有第三同第四个系无时限任食，同任饮生啤，其他两个只有两小时，我哋几个麻甩佬梗系二话不说拣左最贵𠮶个，丧饮生啤。一拣好食边个餐就9秒9点个啤酒塔先，第一个先来Sapporo日本生啤，然后先叫店员落个惹味花胶鸡煲，食完再打边炉。鸡煲拣左小辣，但系辣度都几劲，鸡件份量唔算多，一人两三件就食完，不过唔会死咸，任食来讲都抵赞。一边食鸡煲，避风塘海鲜山同刺身拼盘都上枱，个海鲜山来到有啲失望，得几只虾同濑尿虾，系调味搭够。刺身解冻得几好，唔会一大阵雪味，款式都成十款，不过要食快啲，因为垫底冰块溶得好快。食完鸡煲就来左个蒸海鲜，有鲍鱼，元贝同龙趸片，个头小小但系新鲜，少少蒜蓉调味就足够。之后当然系打边炉，我哋就咁用清汤碌牛，主食黑毛和牛同安格斯牛小排，两只牛味都够，同肉质唔柴，外面都有好多款配料可以自取，特别推介猪润，相当鲜嫩。不经不觉由七点几食到十二点，啤酒塔都饮完四个，之后每人再追加一杯生啤作结，埋单都唔使四百一个人，又食又饮真系去边揾，不过餐厅冷气好劲，同食完会成身味，大家要留意下。