你妳 (已結業)

同同事一齐喺黄埔经过呢间外卖小店，俾佢门口只随意门吸引到，望一望餐牌发现原来系食台湾嘢，好耐冇食过台湾嘢于是同同事一齐就决定喺度买外卖返公司食。套餐有三款，我就要咗1号套餐「夜市盐酥拼盘便当」，另外三位同事都系要咗2号套餐「台式蛋饼」，两个要鲁肉饭一个要干拌面，我同另一位同事好肚饿于是我哋之后再追加一个多士。拼盘便当闻落好香，材料亦都非常丰富，每一款都炸得好香口，虽然系好邪恶，但味道好浓郁真系好好食。台式蛋饼我哋嗌咗三款口味，芋泥肉松、芝士肉松同埋芝士粟米，咬落好香脆而且好足料，每款各有自己特色，个人觉得最好食𠮶款应该系芝士肉松蛋饼。鲁肉饭同干拌面我冇食到，虽然睇落去好似有啲干，但系同事食完之后话我知原来底𠮶度有好多汁，唔会变得好干身。最出乎意料系个「肉松紫薯吐司」，多士唔会因为紫薯变到好淋，同埋第一次食紫薯肉松呢个组合，其实几夹，系咁餐嘅意外收获。嘢饮嗌左杯「白桃乌龙茶」，好正宗好清新嘅台式饮品，而且唔会好甜，几啱我口味。总括而言系几好食嘅，唯一可惜佢只可以外卖自取。