Bread and Bistro (已結業)

除咗去海洋公园， 好少有机会去黄竹坑， 咁啱有朋友喺附近医院生bb， 去探访之后就顺便周围行下揾下食， 以前嘅工业区减慢慢发展成餐厅。见到呢一间cafe 餐厅《Bread & Bistro 》 入座率都好高，野食又好似唔错， 就入去食个lunch。餐厅都有唔同款式嘅食物，沙律， 热食，all day breakfast ， 甜品等应有尽有。呢一个《日式咖哩配吉列猪扒炒蛋乌冬》 里面块吉列猪扒绝对令人有惊喜， 用咗厚切嘅猪扒， 咬落去juicy 多汁， 一啲都唔会鞋口， 而且外层嘅吉烈亦都唔会太厚。 滑蛋够滑又有蛋香， 咖哩汁带有日式咖哩嘅微甜， 大人细路都钟意。另外嘅《all day breakfast》原味pancake配牛油果三文鱼， pancake都几松软， 咸香嘅烟三文鱼， 配上开胃嘅牛油果酱， 健康又好味。 另外又有滑蛋同埋树薯角， 够晒大大份。另外嘅巴洛克芝士蛋糕， 上层嘅芝士香口， 选择咗芋头蓉版本， 甜度刚刚好，赞。整体而言质素不错， 环境对住球场都算开扬， 难怪得到居住 在附近的朋友青睐啦。