肉餅哥小炒料理 (已結業)

由荃湾食到入黎大围，就系想回味一下肉饼哥嘅味道。大围呢间座落喺美林村熟食亭(即以前嘅冬菇亭)，而家装晒冷气，地方仲比荃湾店大，又坐得舒服。而且有屋村停车场泊，唔驶泊街边，可以安心食饭唔驶担心抄牌要走鬼。之前黎食肉饼哥，口味多到数唔到，除左有招牌金莎蛋黄肉饼、土鱿肉饼、花胶肉饼等等...但今次唔见左好立克肉饼呢啲特色肉饼，反而多左小菜类同埋不同款式套餐，明显地想扩阔客源，不再单纯只卖肉饼。既然系咁，我又钟意试新野，就试下佢啲小菜先。碟头细细，但份量不少啊。豆豉炒得啲蚬够香，食落又够惹味，拍得住大排档果啲。几位老友食饭吹水，当然要叫番啲啤酒汽水啦。最钟意佢有玻璃樽装可乐，真系特别好饮架，够气又够冻。身为汤怪嘅我点左个虫草花花胶鸡脚汤，虫草花用黎煲汤味道浓郁，加上花胶同鸡脚可以补充骨胶源，健康又美味，男女都啱饮。呢客椒盐鲜鱿炸得金黄松脆加上点点咸香味，但一定要衬热食，冻左就淋晒架啦。虽然砵酒味清香，仍难掩盖广岛蚝嘅鲜甜美味，加上广岛蚝饱满肥美，食落满足感十足。哗...主角出场啦---足3两花胶肉饼菜饭，目测应该唔止3两咁简单。厚厚嘅花胶铺满香浓红烧汁，中间夹著肉饼，配上菜饭，睇见已经流晒口水