聚華餐廳

营业中

休息中

搬咗黎新蒲岗都四年几，试过好多茶记，都仲系未揾到一间觉得满意嘅常餐，但就响今日俾我食到啦，仲要响楼下好近，点解我唔早啲试呢😭话说今日又系一个唔知食乜好嘅WFH中午，本身谂住唔用脑去mos算啦，去到聚华门口，见到系后生仔嗌人入去食啦，睇门口我一直以为呢间野啲楼面系啲好凶恶嘅大叔而唔敢行埋去，原来又唔系㖞，见到常餐第一个choice有奶油猪，就决定入去试吓。叫咗个常餐系蕃茄牛肉米、奶油猪、热奶茶。个蕃茄牛肉米唔讲得少呀，个汤唔系hea用茄膏，饮得出系有用蕃茄、红萝卜、西芹煲，仲有少少八角味，完全无味精，个面有几旧大大旧红萝卜，啲牛肉系放响碗底倒入热汤浸熟，系爽口个㖞（我觉得应该系有用松肉粉但应该唔多），米粉亦弹牙，总之成件事食味清新又够味，我成碗清晒饮埋个汤呀，已经好耐无试过会饮晒啲汤。个奶油猪更加不得了呀，圆果面系脆皮，平面系软，牛油系有心机咁搽到适量平均，练奶亦系淋到好均匀，咬落去入面系松软而湿润！而个奶茶系茶味奶味均衡无涩味！天呀！成个常餐天衣无缝，好好味呀~~~~~~~埋单系个有style嘅肥仔戴黑石耳环都几型。虽然个环境唔系靓仔同有啲逼，不过我一定会encore架！