The Butchers Club (已結業)

汉堡包喺香港，唔系特别受欢迎嘅项目。始终你几十蚊去老麦又有得食，比多几十蚊去普通西餐厅仲有人serve埋㖭。加上佢本身喺美国系快餐，好难解释点解要用一百几十去食一餐汉堡。但今日啱啱完咗一单大project，想慰劳自己，食啲邪恶又美味嘅嘢，呢间米芝莲推介嘅汉堡店即刻浮上心头。去到睇menu，Classic Burger 要$100而duck fat fries 要$30，加埋饮品百五蚊，系有啲奢侈。一条友对环境要求唔大，一心为食物而来。全店都是美式causal装修，座位清一色高枱高凳，食完快快走。去柜台自己攞，果然外表超邪恶。讲咗薯条先，呢只薯条声称用鸭油炸。食落系比其他地方香脆，而且条条实肉，调味亦恰到好处。虽然可以落茄汁提味，但就咁食都唔觉口干。讲真，$30一份又算OK嘅。汉堡就拣咗Medium，由于包身太高，要揿一揿扁先摆到落口。肉汁未咬已经漏紧出嚟，果然系高质牛肉。入口当然比老麦同一般西餐差天共地，主要系有牛味又有咬口，外层煎到焦香以锁住肉汁，里面仍然保持微暖但唔会有生嘅感觉。加上块汉堡厚度够，每啖都系满口油香。伴随嘅芝士亦系靓料嘅Cheddar Cheese，令成个包唔会太腻。