武士拉麵 (已結業)

星期六，朝早赶住去跑步上training只食咗一嚿包，揼完骨行响街著住羽绒哂住太阳都因为太饿觉得好冻，谂住食碗热辣辣拉面，记起呢间店。虽然接近两点但门口冇人排队店内只得一两个客，似乎继 1/1食咗元气寿司，已注定食神暂时唔记得我。叫咗织田将军拉面(盐味猪骨汤底)。汤底浓稠略胶口带猪骨味，加咗店长推介嘅特制鱼油就即时提鲜。面应属中太面(18号)，拣硬身亦合预期弹牙，黄身但冇碱水味。叉烧表面以火枪灼至微焦，肥瘦相间，肥膏非我最爱入口即溶松软但爽身，瘦位尚算腍身有肉味。配料只有木耳丝冇京䓤细䓤，劲唔开心。溏心蛋调味过咸且汤底太满浸过顶，幸好天气冷未至于熟哂变硬，吃时仍是半熟软软的。绿茶是热，但面前一叠三只杯全部杯底有水，伴面的匙羹都有水，又唔知系生水定熟水。厨房好多杂物，煮煮下嘢有百力滋盒跌落水，仲有个麦当劳纸袋唔知有冇嘢食响架上。店员普遍热心又会问客户啱唔啱食，但问到鱼油落几多其中一个又答唔知要揾另一个。拉面软硬系个人口味，但面条粗幼配搭汤浓淡、配料落乜应有optimal之配，由客人完全自由选择，似乎冇咗店家对自家出品嘅坚持执著性格。