曼谷水門海南雞飯 (已結業)

全店只售卖四款食物 - 青木瓜沙律、海南鸡饭、猪手饭同埋芒果糯米饭。选择虽少但已经包括前菜、主菜、甜品。如果叫晒4款食物嘅话$100都唔洗。两个人叫咗半只海南鸡，一份海南鸡饭，一份芒果糯米饭，连饮品埋单$150内搞掂，咁嘅价钱喺闹市嘅餐厅真系几难揾。▫️海南鸡饭 (HKD30) - 咪以为平嘢冇好嘢。呢份海南鸡饭有份量亦有质量。皮爽肉嫩而且无骨。啖啖鸡肉配埋店家自制酱汁仲好味。海南鸡做得出色，油饭亦都一样。饭粒分明，有淡淡嘅香料味。▫️半只海南鸡 (HKD80) - 我哋食好少饭㗎～所以叫咗半只鸡慢慢食。半只海南鸡塞满成个胶盒，有鸡胸肉、鸡翼等部位，真系好抵食！▫️芒果糯米饭 (HKD18) - 驰名泰式甜品点都要一试！香浓嘅椰汁、烟韧嘅糯米再加香甜嘅芒果，一份价廉物美嘅芒果糯米饭就因此诞生。味道比大型嘅泰国餐厅更好味啊。虽然堂食客唔多，不过我哋用餐嘅时候见到都几多人入去买外卖，目测海南鸡饭同埋芒果糯米饭系最受欢迎嘅。我屋企人都好钟意食海南鸡饭同埋芒果糯米饭😆除咗堂食我哋仲买咗海南鸡饭同埋芒果糯米饭返屋企俾两位老人家食，佢哋食完都话正👍🏻⭐️No service charge