高麗韓國餐廳 (已結業)

一间非常唔显眼，但出奇地又平又靓嘅餐厅。话佢唔显眼，系因为我朋友住响楼上都唔知呢间餐厅嘅存在。而我，响楼我经过几次，根本就冇注意到呢间餐厅有招牌。就算有，凭𠮶个响三楼，又霉又黑嘅招牌，相信好少人会入去。简直系沧海遗珠，宣传上嘅悲剧！呢间餐厅嘅装修好好，暗暗哋好似中式西餐厅𠮶只，啲位够阔，卡位有皮座位，重有好多六至八人嘅枱，应该会好适合大班人去。午餐烧烤，$38一位，钟意可以自己烧，惊烧得差就可以叫厨房煮，一样价钱。一人一碟肉，以价钱黎讲，算好大碟，起码去food court都唔会俾咁多你。重有几碟配菜，汤、饭、饮嘢同甜品，真系好鬼正。配菜除咗平时𠮶啲泡菜之类之外，居然会有韩式炒年糕！呢啲系平时要俾钱嘅特式小菜，呢度就当配菜请你食。而碗汤，其他餐厅俾嘅系清汤，顶多有片白萝卜同葱，但系呢度嘅汤系有汤渣嘅（最正𠮶忽），重居然有只蚬响里面，简直系惊喜！饮嘢有菊花茶同酸梅汤拣。好细杯，但系起码个菊花茶唔系过甜。而甜品系青柠啫哩。唯一唔好系，只甜品匙羹洗唔干净，有啲上手嘅嘢痴咗响度。咁多嘢先至$38加一，去边度揾？夜晚任烧都只系$128，揾日一定会去。