燒肉臻 (已結業)

最近成日都同啲朋友会约埋一齐饮酒，有一次突然间有人提议嚟尖沙咀呢间餐厅，因为有90分钟清酒任饮，佢有好多唔同款嘅清酒，全部喺机入边自助式咁样揿嚟饮，唔同嘅清酒都可以试吓，几特别，所以我哋特登约埋一日嚟食饭加饮酒，虽然话清酒任饮，但系啲嘢食嘅质素其实都唔错！番茄蒜子沙律个摆盘已经好特别，好似掌上明珠咁样，番茄鲜甜，加埋蒜子溶有冲击味蕾嘅效果。甲罗烧同酒盗芝士两个都系沾梳打饼食，一路饮酒一路食呢个其实好配！其中一个必点嘅item我觉得一定系南非鲍鱼，同一定要点个柚子胡椒，见到师傅好俾心机烧，烧完热辣辣食，完全冇鞋！鹿儿岛a4和牛盛盒包括三角胸小排，肉眼盖同背峰，全部都好肥美，入口即溶！不过我最钟意嘅都系美国牛舌，因为佢超厚切！伊比利亚猪肋条同夹心肉两个都唔错！呢度嘅好处就系佢都有好多海鲜选择，今次我哋就要咗白鳝同赤鱿鱼筒，两者都系师傅帮我哋烧嘅，见到用咗好多心机去烧，白鳝个酸汁十分之出色，趁热食嘅时候啲骨仲系软嘅，可以大啖大啖咁食，外面脆卜卜，好正！