八妹雞煲

营业中

休息中

Item: 八妹雞煲
Rating: 3
Author: 奥志雷

Bamei Chicken Pot

4.5

540 食记

味道

环境

服务

卫生

抵食

14713

大埔

$101-200

川菜 (四川) 火锅鸡煲

467

奥志雷

等级4

2.1K

失惊无神又鸡煲，食过翻寻味？报名人数非常拥跃，好多朋友仔都一齐食，真系要叫两只鸡先够食。Lunch 饮完蔡润记劲辣既辣椒油后已经开始有点肚痛，一于少理话之佢，继续辣鸡煲，美食大过天 ﹗

新开八妹鸡煲晚市都几旺架㖞，人山人海，排晒长龙。洗唔洗咁夸张呀？六点半已经排晒队，唔洗钱咩。上网调查一下，开到零晨两点而且有分店添㖞 ﹗唔想企系门口等位，食西北风当前菜咩 ﹗梗系叫外卖去对面 Baby 慢慢叹好过啦，而且有大量酒精供应、有电脑镖掟、有卡拉 ok 唱、有啤牌玩、有干净企理独立厕所用、地方宽敞、服务殷勤有礼。

八妹唔送外卖？仲要比 $300 大元按金先可以借煲？算数，我地豪比您。鸡煲到会，应该系外卖自取先正确 ﹗长发绻毛阿姐一款唔休做嘴脸啰 ﹗眼见全部都系顶手顶脚既二人迷你台，放个煲已经无位剩，多人先会合体。舖面迫夹、通道劲窄、台椅密麻麻，一睇都知坐得唔舒服。

仔细研究一下 menu，食材选择都不少呢，而且有海鲜及前菜小食供应，不过价钱都算贵。我要迟少少到场，朋友们食住等所以起筷先喇。好一顿丰富既船河后晚餐，Good Good Good，幸福又满足，好好味架呢 ﹗食都系其之，最紧要成大班朋友一齐食，特别开心、特别滋味 ﹗第一次食得最多唔熟食物，鸡子唔熟、猪红唔熟、生蚝唔熟、芝士鳕鱼鱼蛋唔熟、豚肉唔熟、田鸡唔熟、等等等唔熟，哈哈。

痲辣鸡煲一只中辣，配料有紫洋葱、生姜、芫茜、黄辣椒仔、花椒、等等，多谢 $188 蚊，合理价钱。初时无咩味道，要肴返十多分钟，酱汁渐渐浓郁收干，香菜配料开始出味，味道带麻而微辣，香气扑鼻，口水即时失控地流呢 ﹗鸡件滑滑，肉多骨少，每口带著肉汁跟辣汁，先辣后麻，最后甜味涌上，真心好味道，赞 ﹗

紫洋葱、蒜子熟透索汁，香甜味美，如果有碗白饭亲托下就真系无得顶呀 ﹗大家都食到唔停口呢，抢呀 ﹗加上汤打边炉前，用芋丝、竹笙、响铃、牛柏叶、等等，总之要吸汤力强，索尽痲辣汁，一野啪落口，热烫烫爆开，正到震 ﹗

痲辣鸡煲辣一只走辣，唔辣边好食架，味道似三杯鸡，浓烈甜甜的酱油味道，鸡都依旧美味既，一试无妨。我自己另外叫个痲辣汁大辣自私食，无问题既！唔辣就似甜酱油鸡唔好食，微辣又唔够惹味，到喉唔到肺，中辣味道就刚刚好喇。够香够辣又够痲，最后带点点甜味余韵。食大辣只不过为左份超刺激劲痲痺既高潮感觉，全身冒汗湿透 high 到爆，但会盖过所有食材味道呢，而且会有火烧后栏既危机添 ﹗

药膳醉鸡锅一只，靓汤一滚，天使都企唔稳，香气一巴巴地车埋黎 ﹗鸡件都未落已经如此薰芳扑鼻，落埋鸡仲得了既 ﹗汤底真材实料无揾苯，酒香清甜香喷喷，浓郁宜人可口药材味，好想饮反碗汤呢。鸡肉嫩滑多汁，食完一旧又一旧，正㖞。

痲辣汁大辣，多谢 $12 呢。依个汁不得了，浓缩加强版，无沟汤直接浸黎食就更加辣，成旧鸡浸完先食，地狱浓缩版，地狱级刺激，好鬼 high 呀 ﹗一般都系加落汤度，我就直接食。劲呀，劲痲劲辣，越辣越爽越刺激，头顶出烟、全身发滚，辣到出晒水，一路滴汗、一路食鸡，食得津津有味。饭后火烧后栏都在所不惜，好采唔系好严重乍！

手切本地肥牛，难得较以往质素好，不过都系可有可无。微弱的牛味，脂肪香甜味欠奉，质地滑溜溜，合格唔难食，过过口瘾可以。安格斯肥牛，跟本地肥牛差不多，算罢啦。一向八妹牛都系麻麻地，淡而无味，质感腍劈劈，到底系咪用过松肉粉呀？翠荣手切牛颈脊好百倍，特浓牛味加上丰富肉汁，鲜甜味道，八妹无得比。

火鸡子，夸张地超巨形。渗透浓浓麻辣汁后，没半点腥嗅雪藏味，剩下脆脆外皮、嫩嫩多汁香肉，好味㖞。鲜鸡子，有惊喜 ﹗居然有新鲜本地鸡子，唔洗食有腥味雪藏火鸡子 ﹗本地鲜鸡子有种独特又香浓既鸡蛋黄香味，甜甜又甘香，而且质感棉滑非凡，味道出众，实在系无敌鲜甜可口美味。

炸薯仔，对我来说是个新尝试，从未谂过薯仔可以打边炉。炸过既薯仔好香口，而且索汁一流，最爱烚到透彻，完全吸收汤汁，无得顶。芝士豆腐丸，感觉好似鳕鱼鱼蛋酿左芝士，唔似豆腐㖞，味道几有趣，唔难食。

芝士鳕鱼鱼蛋，痲辣撞芝士怪怪的。芝心丸，外爽内流心，大路无投诉。鱼皮饺，滑而韧又带腥，免免强强。新加坡鱼蛋，老板话真系新加坡搭飞机黎架，有咩特别呢？质感弹牙，浓郁鲜鱼味而散发著清新咸香，有料到，食得过，又真系几好食，推介 ﹗

黑豚肉，何解腍劈劈又鞋烚烚既？不脆不爽不弹，out ﹗鸡髀菇，正常普通料，微爽微弹，轻轻的菇味，可塑性高，什么汤底就什么味道。脆鲩鱼腩，切得公正又厚薄刚刚好，色泽鲜明湿润。浸几分汤即起，咬落脆卜卜又爽弹，而且仲劲多肉汁添呀 ﹗肥美香甜的鱼脂非常甘香，可口肉质带著微弱草青味，吸引浓郁麻辣汁后都食得下㖞。

莴笋，我一直觉得系大陆传入，但朋友话系台湾传入架㖞。莴笋即油麦菜茎部，鲜艳翠绿既颜色尤其吸引。因为觉得好好味，所以追查其身份之迷。灼一灼即食，非常爽脆多汁。炆一炆慢食，软棉滑滑吸尽汤汁，一咬爆汁像食瓜一样。一种食材，两种食法，同样 good fit。

野生竹笙，简单的菌类，好少话会难食，必选生料之一 ﹗索尽鸡煲辣汁精华，啖啖爽脆、啖啖爆汁，不得了 ﹗田鸡，肉质腍劈劈，一咬即散，不结实、不弹牙，新鲜度强差人意。

熟牛坑腩，第一次系火锅店见。已经熟透架喇，估您唔到咁都比您谂到。已经烚熟既牛坑腩原汁原味，掉进痲辣锅让他自由地游游水，用黎索汁超正 ﹗要比多一点耐性，要够谂就要花点时间索够汁先得，如果就咁食会好淡口。吸收酱汁后直跳入口中跟舌头一齐翻腾，牛味非凡，散发著美味痲辣味，质地松化，弹牙结实有嚼劲，嫩而无渣，比肥牛出色多倍，好味道。

日本蚝，入晒雪，无洗过，捆晒黑边，卖相一点都不讨好。烚完后，味道带腥，腍劈劈唔坚廷，仲缩晒水添。八妹海鲜及牛肉同样麻麻地，如果唔系朋友仔想试，都唔会 order。

响铃，当真即叫即炸吗？可能系真㖞，油淋淋反晒光出场，温度微暖。用筷子夹住拖一拖够松化，不过油味浓厚㖞。我最爱掉件响铃自由地浸浸辣汤，浸得软棉透彻最好食，咽韧滑溜，舔舔嘴。香菇贡丸，浓浓菇味香喷喷，肉丸爽而微弹，渗著肉汁，比棒球贡丸更美味。

午餐肉，以前的我绝对唔会用、亦唔会谂到午餐肉打边炉，而且硬系觉得系 cheap 野。直到痲辣锅盛行，有朋友仔 order 㖞，一试即时眼前一亮呀 ﹗让午餐肉慢慢沐浴在汤汁之中，充份吸引所有精华，变得嫩滑非常，不是平时的质感呢。一赵汤汁激射，香气飘飘，味道散发著肉香又夹杂香料，好鬼好食啫 ﹗

韮菜饺，皮厚死实，馅料香甜欠棒无生命，入得口唔难食。外购货又雪到入晒雪，点及成仔记日日新鲜包既韮菜饺呢 ﹗棉棉冬瓜片、粉粉薯仔片均是吸汁高手，让辣汁更加浓缩，入口爆汁，刺激到额头冒汁，好 high 啊。

牛柏叶，灼一灼即食，劲爽呀 ﹗挂满痲辣汁，好鬼正，最敝朋友仔落汤太多，搞到过淡，无晒味啰。油麦菜，非常少食既一种菜，突然想食。满意满意，爽嫩不粗糙，跟痲辣汁都几夹，好味。绍菜，又称黄芽白，又称大白菜，超甜又多汁，但硬系有种太普通、太平价，cheap cheap 的感觉。

黄帝菜，以前的我最怕，因为草青味道使我作呕又反胃 ﹗但近年已经克伏左喇，仲越食越喜欢添，依家发觉同麻辣汤底非常之夹，超级好味呢 ﹗爽嫩甜美又多汁，一条一条不停地送入口，大爱。猪红，腥味强劲，质地不够滑溜多汁，硬掘掘，不喜欢。猪润，最紧要望到实，睇准时机即时起菜掉入口 ﹗烚得刚好无过火，不鞋不韧不干，爽滑细致，中间微微粉红，鲜嫩泛著麻辣味，非常满意。

美国桶蚝，无洗过直接上台，黑色的裙边。巨形桶蚝带子位及裙边都有渣，全数吐掉。慢慢烚到收干水，当蚝肉变得实净肥嘟嘟，系机会喇 ﹗狠狠地咬入口中，肥美蚝味浓浓、蚝汁丰富，好满足啊 ﹗

金菇、竹笙、生菜，大路甜美爽爽无投诉，挂著大量辣汁赵得开心又兴奋。牛丸、芝士肠，大路外购唔难食，食左都唔记得。鲜腐竹，滑滑索味都不错，仍能食得到豆香。棒球贡丸，size 巨形好新奇，免强塞到入口都赵唔到呢。净猪肉贡丸无香菇，味道同质感都跟扎肉一模一样，单调的肉丸味道，幸好有咬口。

扭纹薯粉，跟痲辣简直是天作之合，扭纹比滑嘟嘟薯粉挂汤力更强，同样咽韧劲弹又滑溜，带著大量痲辣汁跟舌头打滚，浓浓辣味直冲脑袋，好 high 好食味好刺激 ﹗

手打乌冬，最紧要时间将握得好，滑溜咽韧、米香出众。几乎永远都系压轴出场，索尽所有菜肉、海鲜精华，连面带汤啜入口，滋味无穷，味道百鸟归巢、复习丰富，好好味啊 ﹗

八妹雞煲 营业中 休息中

八妹雞煲

营业中

休息中