Bondi (已結業)

想试荔枝角嘅Bondi好耐，呢次终于去食喇，佢其实系同程班长晌同一层。由餐牌中得知店名Bondi系澳洲其中一个海滩，亦系店主长大嘅地方，所以店内不乏同澳洲有关嘅布置，其中一面墙更画咗树熊图案。去楼上餐厅都钟意坐窗边，可以边食边担天望地，感觉较自在。不过地面餐厅就视乎情况而定，如街道上人流较多就唔会拣窗边。餐牌系佢哋自己印制，睇落都算鲜明。饮品𠮶张嘅排版好似仲几可爱。呢日试厨师推介入面嘅意大利饭，可加$28配餐汤或沙律同饮品。沙律，蔬菜爽脆，当中有较浓味嘅火箭菜，而蟹柳就偏向扎实。面包，经烘至微暖，质感松软带牛油香。蟹皇意大利饭配软壳蟹，碟边用黑醋、辣椒粉同黑芝麻点缀。侍应事前仲特意提醒，话佢哋嘅厨师会将意大利饭煮到七成熟左右，口感上比较硬，我嘅接受程度较大，就回应无问题。米粒表面轻轻沾有蟹皇汁，质感确系外软内偏硬，呢种嚼劲对我而言都几有趣，但对某啲人来讲可能会觉得生同咀嚼费时，所以事前记得要同侍应讲好自己嘅喜好。米粒间嘅枝豆甚有咬口，软壳蟹表面就蘸咗炸浆，食落香脆。最后我仲拣咗Flat white，系一款奶泡较Latte同Cappuccino薄嘅咖啡，事后晌网上得知呢款咖啡系源自澳洲。