拾味正宗刀削麵館 (渣甸街)

营业中

休息中

近年市面上充斥著辣味、酸味的汤面，食到好寡，想揾间清清淡淡又有啲独特风格面店愈来愈难。本人孤漏寡闻，认真谂谂，刀削面，好似真系无食过约次，所以听到公司附近有间之后，即晚放公就孤家寡佬一支公去试试。面馆一间，门面同装修都系咁上下，而且点菜拣𩠌方式都好香港style，自己拣𩠌逐样加钱。唔同嘅系面底，主打刀削面：汤面、冷拌、热拌⋯⋯拣碗汤面润润喉咙，搭蒜泥熏蹄同上海云吞。汤底睇落清淡，饮落清甜带微咸，润喉易入口，唔使再食重口味调味料汤面咁heavy👍🏾刀削面底口感几丰富，烟烟韧韧几有𡁻头，而且挂到汤。其实面质软硬度可以要求，淋啲硬啲自己拣。云吞系菜肉馅，味道上无咩特别。但系，个蒜泥熏蹄就唔同讲法，蒜泥应该混合咗啲醋，酸酸地仲有蒜泥嘅香辛味，香浓刺激味蕾，配合软嫩弹牙嘅熏蹄肉都几惹味，一口接一口，同汤面浓淡交替互相补位认真唔错。望望身边其他食客，好多都单丁帮衬，睇落都似附近街坊或打工仔，一个人的晚餐都拣呢间面店，证明有一定cp值。